Juan Carlos Meana (Vitoria-Gasteiz, 1964 - Pontevedra, 2023) artistaren lan teoriko eta literarioa haren obra artistikoaren osagai gisa aztertuko diren jarduera honetan parte hartuko du Euskal Herriko Arte Garaikidearen Museoak, Artium Museoak. Jardunaldian José Angel Artetxek, Javier Tudelak, Fernando Illanak, Gonzalo Rey Villarongak, Enrique Martínez Goikoetxea keta Txaro Arrazolak hitzaldi bana emango dute eta guztia mahai-inguru batekin amaituko da. Mintegia azaroaren 22an egingo da, 17:00etan, eta irekia eta doakoa izango da.

Juan Carlos Meana artista eta irakaslea 2023ko urtarrilean hil zen Pontevedran, Arte Ederretako irakasle zen hirian. Haren irudia eta artearen alorrari egindako ekarpena berreskuratzeko asmoz, lagun-talde batek bere idazkeraren inguruko mintegi bat antolatu du, Euskal Herriko Arte Garaikidearen Museoaren, Artium Museoaren laguntzarekin. Testuinguru horretan eta antolatzaileen hitzetan, jarduerak «Juan Carlos Meana (Vitoria-Gasteiz, 1964 - Pontevedra, 2023) artistaren lan teoriko eta literarioari heltzea proposatzen du, bere obra artistikoaren zati eratzaile gisa, zeina autodeskripziotik urrunduz doan, poetikotasun eta poietika unibertsalera hurbiltzeko». «Meanak idazketarekin duen harremana nabarmena da haren lan osoan. Haren poesia eta lanak, liburuetan ez ezik, bereziki instalazioetan, eskultura-hitz zintzilikatuetan eta harriz grabatutako aforismoetan edo Gijongo Barjola Museoaren (2008) instalazioan hormaren gainean idatzi (eta marratu) zuena bezalako esaldi iheslarietan gurutzatzen dira: “No nos tendremos nunca (La sed de Narciso”».

Ekitaldia azaroaren 22an izango da, ostiralean, arratsaldeko 17:00etan, eta sei hitzaldi labur eskainiko dituzte José Angel Artetxe, Javier Tudela, Fernando Illana, Gonzalo Rey Villaronga, Enrique Martínez Goikoetxea eta Txaro Arrazolak. Azkenik, mahai-inguru bat egingo da gonbidatu guztien parte-hartzearekin.

2019ko ekainetik irailera, Artium Museoak artistaren azken lanen zati bat aurkeztu zuen Nos[yo]otros erakusketan, non Meanaren kezka nagusietan sakondu nahi baitzen, epikaren eta ziurtasun handien hondamena sasiz garbitzeko kontrahistoria bat egiteko. Hain zuzen ere, erakusketa honetako katalogoan agertzen den «Artelanen zeregina» testua erreferentzia izango da mintegiko hitzaldietarako, nahiz eta parte-hartzaile bakoitzak bere ikuspegia adierazi ahal izango duen Meanaren idazle-nortasunaren beste alderdi batzuetara.

Juan Carlos Meana Martínez (Vitoria-Gasteiz, 1964 - Pontevedra, 2023) artista eta irakaslea izan zen Vigoko Unibertsitateko Pintura Sailean. Arte Ederretan doktoratu zen 1993an Euskal Herriko Unibertsitatean. Bere jarduera, hasiera batean, pinturaren praktikan oinarritu zen, baina gero beste diziplina artistiko garaikide batzuetara zabaldu zen, bereziki eskultura eta instalazioetara, eta hogei bakarkako erakusketa baino gehiago eta erakusketa kolektibo ugari egin zituen. Era berean, praktika artistiko garaikideari eta artearen irakaskuntzari buruzko hausnarketa-lan bat egin zuen, artikuluak eta liburu monografikoak argitaratu zituen, doktore-tesiak zuzendu zituen eta ikerketa-taldeetako kide izan zen. Haren sorkuntzak eta ikerketak hainbat gairen ingurukoak izan ziren, hala nola Nartzisoren mitoaren eta ispiluko irudiaren baliabide plastiko ugarien ingurukoak; irudiaren ukazioa sormen-estrategia gisa; edo gizabanakoaren eta bere talde sozialaren arteko tentsioak, tentsio hori irudien, objektuen eta sinboloen bidez adieraziz.