Musée d 'Art Moderne de la Ville de Pariseko arte garaikideko komisarioak hitzaldi bat eskainiko du datorren asteartean, azaroak 7, 18:30etik aurrera, Museoaren etorkizunak zikloaren barruan, Euskal Herriko Arte Garaikidearen Museoak-Artium Museoak antolatuta. Dressen arte ederren kontzeptu tradizionala zabaltzearen alde dago, uste baitu aniztasunaren nozioa oinarrizkoa izan daitekeela erakunde mota berri bat, inklusiboagoa eta zeharkakoagoa, eratzeko. Artium Museoak artearen arloko eragileak gonbidatu ditu topaketa hauetara, museoaren etorkizunaz eta ondarea babesteko eta jakintza ekoizteko duen gizarte-erantzukizunaz dituzten ikuspegiak eman ditzaten.

Biltegitik kanpora! Edota, Nola pentsatu museo bat askotariko arteetarako? hitzaldian Anne Dressenek COVID-19aren pandemiaren ondoren Parisko École Normale Supérieuren hasi zuen proiektu akademikoaren emaitzak izango ditu abiapuntu. Denboraldi batez bere jarduera kuratorialetik aldentzeko eta «askotariko arteen» adigaiaren ikerketa hala teoriko nola praktikoan sakontzeko hasi zuen ikerketa, eta kontzeptu horrek arte ederrak eta dekorazio- eta herri-arteak barne hartzen ditu, mendebaldekoa ez den artea barne, ohiko hierarkietatik edo paradigma entziklopediko arazotsutik kanpo. Dressen ziur dago askotarikotasunaren nozioa oinarrizkoa izan daitekeela erakunde mota berri bat pentsatzerakoan, inklusiboagoa eta zeharkakoagoa, baina baita gero eta bere buruaz gogoetazaleagoa ere. Hitzaldi horretan, Dressenek bere ikerketa nola garatu den aztertuko du, eta, Museoaren etorkizunak sailaren izenburua hitzez hitz harturik, hausnartuko du zergatik ez dagoen oraindik halako museorik, eta nola existitu litekeen. Zer ahalmen politiko eta kontzeptual izan lezakeen.

Bere ustez, museoaren biltegiratze-espazioak eredu metodologiko berri bat sustatzeko balio izan dezake: mukuru betetako kripta hauetan, artearen historiako kanonen subkontzientearen hondarrak, hainbat objektu sailkaezin eta deskokatuak daude (hau da, maisulanak, eskola artistikoak, kronologia, geografia edo diziplina artistikoak), ohiko sailkapenei jarraitzen ez dieten kokapen surrealistetan. Era berean, Dressenek museoaren arauak eraberritzen lagundu duten aitzindariei (pentsalariak, arkitektoak eta artistak) buruzko hainbat ideia partekatuko ditu, eta eszenografia eta bitartekaritza modu irekiagoan, polifonikoagoan eta sortzaileagoan nola egin hausnartuko du.

Anne Dressen

Anne Dressen Parisko Musée d 'Art Moderne de la Villeko arte garaikidearen komisarioa da. Bertan, baliabide artistiko gutxietsiak jorratu dituzten hainbat taldeko erakusketaren komisarioa izan da: ehunak eta tapizak (Decorum), zeramika (The Flames), bitxigintza (Medusa)…, baina baita bideo musikalak (Playback) edo kopiak eta faltsifikazioak (Seconde main) ere. Ikerketa-proiektu horien bidez, eta ikuspegi antropologiko batetik, zalantzan jarri eta problematizatu ditu erabat zilegiztaturik dauden arte «eder» edo «noble»-ekiko dituen harremanak.

Museoaren etorkizunak zikloa

Museoaren etorkizunak izenpean, Euskal Herriko Arte Garaikidearen Museoa-Artium Museoa, bere hogei urteurrenaren barruan, topaketa batzuk programatzen hasi zen artearen arloko eragileekin, museoen etorkizuneko ikuspegiei eta haien gizarte- eta ondare-erantzukizunari buruzko eta ezagutzaren sorkuntzari buruzko beren ikuspegiak emateko. Urteurrena igaro ondoren ere, Artium Museoak hainbat pertsona ospetsu gonbidatzen jarraitu du ekimenari ahots berriak gehitzeko. Anne Dressenen hitzaldia zikloko zortzigarrena izango da, Michael Marder filosofo eta Ikerbasqueko katedradunak, Elvira Dyangani Ose MACBAko zuzendariak, Yaiza Hernandez filosofoak, Filipa Ramos idazle eta komisarioak, Asier Mendizabal artista eta irakasleak, Nuria Enguita IVAMeko zuzendariak, Clémentine Deliss Cambridgeko Unibertsitateko irakasleak eta Juan Luis Moraza artista, komisario eta Vigoko Unibertsitateko irakasleak bisita egin ondoren.