Sorkuntza-prozesuaren lehenengo fase horretan, bere lan-metodologia zuzenean ezagutu nahi duten pertsona guztiei irekia izango den topaketa-espazio bat proposatzen du artistak; solasaldi-espazio bat osatu nahi du, proposamen artistikoa egituratzen duten gaietako batzuei buruz jarduteko, nola diren ugalketa, lanaren sexu-banaketa landa-eremuetan, osasun-turismoa, bizi-erritmoa testuinguruaren arabera. Horretarako, bainuetxeko ateak zabalik egongo dira arratsaldez, abuztuaren 15etik 30era, 16.00etatik 19.00etara. Ekimen horren bitartez, artistak “herriaren eta hurbileko ingurunearen eguneroko testuinguruan sartu nahi du, poliki-poliki, jarduera artistikoa”.

Bi aste horietan ekoitziko ditu Arrazolak izaera hibridoko lan gehienak, formatu handiko marrazkiak, hiru dimentsioko piezak, instalazioetan eta bideoperformancean amaituko dutenak; horiek guztiek osatuko dute irailaren erdialdeaz geroztik ikusi ahalko den erakusketa. Artistak berak adierazi bezala, “emakumearen, pribatuaren eta geldiaren eremura atxikitako proiektu bat da, haize kontrako filosofia mota bat, gaur egungo bizimoduaren aurrez aurrekoa guztiz”. Horregatik, “slow bizimoduaren” gaia lantzeko baliatuko du bainuetxearen eremua, gaur egun gure gizarteetan nagusi den abiadura zoroaren aurrez aurre.
 
Arrazolak Kuartangon hasiko duen lanarekin batera, Nerea Lekuonak eta Iñaki Larrimbek beren proposamen artistikoen ikerketa eta aurreprodukzio prozesuetan jardungo dute; lehenak Garaioko Interpretazio Zentroaren inguruan erakutsiko du bere proposamena, eta bigarrenak, berriz, Atauriko Euskal-Nafar tunelaren eta Nerbioiko parke linealaren behatokian, Laudio eta Amurri bitartean.

Ekinean Ibiltari esku-hartze eta esperimentazio artistikoko programa bat da, Artium Museoak eta Arabako Foru Aldundiaren Euskara, Kultura eta Kirol Silak sustatua; helburu nagusia du arte garaikidearen eta lurraldearen artean interakzio-espazioak bultzatzea, arreta berezia eskainiz landa-ingurunearen, eremu naturalaren eta testuinguru sozialaren arteko elkarrizketan.  Kulturaren Plan Estrategikoaren barruan kokatuta, Ekinean Ibiltari egitasmoak besteak beste bilatzen du jarduera artistikoa eremu ohiz kanpokoetan lantzea, eta orobat tokiko sorkuntza babestea eta sorkuntza eta pentsamendu garaikidea arabar gizarteari hurbiltzea, landa-eremukoari bereziki.