ARTres. Museo bat nolakoa izan behar den Artea eta (artearen) sistema egitasmoaren azken kapitulua da. Proiektu hura gardentasun-ariketa bat izan da, eta Bildumako artelan ikonikoenak erakusteaz gainera (Artea) publikoari artearen historia bat eskaini zaio eta artelanak eskuratu eta zaintzeak berekin dakartzan prozesu guztiak erakutsi zaizkio (Artearen sistema). Artea erakusketan hautatutako artelan gehienak eta haiek erakutsi diren modua, hau da, muntaketa, XX. mendeari dagozkion arauen araberakoak izan dira. Hirugarren honek hausnarketa bat abiarazi nahi du: nola antolatu behar dira museoak? nola bildumatu eta erakutsi behar dira artelanak? nola «onartu behar dituzte unean uneko erronkak etorkizuna eratzeko»?

ARTres —Artearen kontrapuntu eta bizikide— bi ideia nagusiren inguruan taxutu da: arteari, garai batetik bestera, genero batekoa zein bestekoa izan, gai berberak interesatzen zaizkio; eta emakumeak, talde gisa, beti ukatu izan zaizkion gizarte-esparruak konkistatzen ari dira, eta artea ez da salbuespena.

Alde batetik ARTres osatzen duten artelanen muntaketa —guztiak, lau izan ezik, mende honetan eginak— hiru diskurtso-ildoren arabera antolatu da: introspekzioa (pertsona eta haren barru aldea), ikuskatzea (mundua, paisaia, politikak, gatazka…) eta artea bera (sormena, estetika). Artea erakusketako artelanen antolaeraren ardatz berberak dira. Hartara, Bildumaren erakusketa berri honek defendatzen du artisten interes nagusiek bizirik jarraitzen dutela denboran zehar eta generoa gorabehera.

Beste alde batetik, ARTresen planteatzen da generoaren kontua dela gaurko eta biharko erronka handienetako bat hala museoentzat, erakunde gisa, nola artearen sistema osoarentzat. Daniel Castillejok berak dioen eran: «Bizi garen garai asaldatu honetan, emakumeari beti ukatu izan zaizkion gizarte-espazioak konkistatu —lehendabizi— eta —gero— normalizatu beharrari aurre egin behar diogu, eta artea lotsagarrienetakoa da». Erakusketarako hautatu diren artelan guztiak, bat izan ezik, emakumeek eginak dira. Erakusketa, oro har, esperientzia estetiko bizia da, eta ohartarazpen bortitza generoaren kontuaz artean.

Gainera, oraingo honetan, erakusketa inauguratu aurrerako, mahai inguru bat antolatu du Museoak eta lau emakume artistak parte hartuko dute bertan. Concha Jerez-ek, Ixone Sádaba-k, Maite Martínez de Arenaza-k eta Charo Garaigorta-k beren iritziak emango dituzte gai honi buruz. Bai mahai-ingurua eta bai inaugurazioa edonorentzako zabalik daude.