Ledok amaitu gabeko borroka baten kontakizuna egin du dokumental honetan, A Pontesako zeramika fabrikako emakume kementsu eta karismatikoena. Zikloa Artium Museoak eta Tabakalerak, Kultura Garaikidearen Nazioarteko Zentroak, elkarrekin egindako proposamena da

Artium Museoaren, Euskal Herriko Arte Garaikidearen Museoaren, Emanaldi aretoan, Margarita Ledo zuzendari galiziarraren Nación filma proiektatuko da datorren larunbatean, ekainak 5, 18:00etan, Zinema feministaren historiak zikloaren barruan. Margarita Ledok amaitu gabeko borroka baten kontakizuna egin du dokumental honetan, Pontevedrako A Pontesa zeramika fabrikako emakume kementsu eta karismatikoena, hain zuzen ere. 2001ean itxi zuten behin betiko, 1980ko eta 1990eko hamarkadetako birmoldaketa industrialaren ondorioz. Aitziber Olaskoaga zinemagileak egingo du filmaren eta zuzendariaren aurkezpena. Zinema feministaren historiak (Tabakalera Kultura Garaikidearen Nazioarteko Zentroaren eta Artium Museoaren arteko lankidetzaren emaitza) zikloaren helburua emakume zinemagileak eta haien sorkuntzak aldarrikatzea eta ezagutaraztea da.

A Pontesa zeramika fabrika ixtearen aurkako borrokan protagonista izan ziren emakumeen ahotsak biltzen ditu, 20 urte geroago, Nación dokumentalak. Zinemak askotan jorratu du langile-borrokaren gaia, baina film horietan gutxitan agertu da borroka horrek emakumeentzat duen espezifikotasuna, lanean hasteak ekarri zuen askatasunaren ondoren, industria-sektorearentzat ere nahasiak izan ziren garai haien erdian.

A Pontesako zeramika fabrikako emakume kementsu eta karismatikoen aurpegi eta ahotsen bidez, Margarita Ledok amaitu gabeko borroka baten kontakizun hunkigarri, borrokalari eta poetikoa eraiki du. Nación joan den martxoan estreinatu zen zinema-aretoetan eta, zuzendariaren hitzetan, «emakumeok eskubideak izateko behar izan dugun denbora luzea aztertzen duen filma da, ez bakarrik botoa emateko, baita soldatapeko lana eta independenteak izateko aukera lortzeko ere. Laburbilduz, zenbat kostatu zitzaigun Nazio izatea».

Margarita Ledo (Castro de Rei, Lugo, 1951) galiziar kulturako irudi garrantzitsu bat da, zinemagilea, idazlea eta Santiago de Compostelako Unibertsitateko Ikus-entzunezko Komunikazioko katedraduna. Poesia, narrazio-liburuak eta saiakera argitaratu ditu, baina baita hainbat ikerketa lan ere. Santa liberdade (2004) izan zen bere lehen film luzea, eta haren ondoren Liste, pronunciado Líster (2007) eta A cicatriz branca (2012) fikzioa etorri ziren, bigarrena Porta blindada nobelan oinarritua; hainbat lan esperimental eta dokumental ere egin ditu. Premio Nacional da Cultura Galega saria jaso zuen 2008an Zinemaren eta Ikus-entzunezkoen arloan, Otero Pedrayo saria 2017an, eta gainera Galiziar Akademiaren kide da.

Artium Museoak eta Tabakalerak antolatutako Zinema feministaren historiak zikloak emakume zinemagileen lana aldarrikatu eta ezagutarazi nahi du. Zuzendari horien sormen-unibertsoan sakontzeko, zinemari eta kulturari lotutako emakume batek egiten du aurkezpena proiekzio bakoitzaren aurretik.

Naciónen ondoren, uda ostean jarraituko du zikloak, eta film hauek guztiak ikusi ahal izango ditugu: Barbara Hammer-en Audience (1983) eta Xiana do Teixeiroren Tódalas mulleres que coñezo (2018), Irati Crespo ikertzaile, kritikari eta zinema-komisarioak aurkeztuak, Helke Sander-en (The All-around Reduced Personality - Redupers, 1978), Lola Hinojosak, Reina Sofia Museoko zinema eta bideo kontserbatzaileak aurkeztua, Nina Menkesen (Queen of Diamonds, 1991, Ainara Elgoibar artistak aurkeztua eta Claire Simonen (Mimi, 2003), Katixa Agirre idazleak aurkeztua.

Zinema zikloa. Zinema feministaren historiak II

Nación. Margarita Ledo, 2020
Aurkezlea: Aitziber Olaskoaga, zinemagilea
Ekainaren 5ean, larunbata, 18:00etan

Prentsa oharra (pdf)  Zikloaren programa  Pelikularen trailerra  

Publicado en Prentsa bulegoa

Zinema ziklo honen bigarren edizioaren helburua emakume zinemagileak eta haien filmak ezagutaraztea da.

Publicado en Jarduerak

Emakumeen Nazioarteko Eguna dela-eta, egitarau berezia antolatu du Artiumek, emakumeek praktika artistikoan duten presentziaren auziarekin loturiko hainbat alderdiri buruz gogoeta sustatzeko; emakumeek artean duten presentzia baita, hain zuzen ere, Museoaren proiektuaren zeharlerroetako bat, haren lan eta ikerketa-esparru guztiak ukitzen dituena.

Emanaldi aretoko jarduera guztietan, sarrera doan.
Beharrezkoa da erreserba egitea 245 20 90 20 telefonora deituta
Streaming bidezko emaitza eta Artiumen Youtube kanalean.

Martxoaren 5ean, ostirala

Aurkezpena: Artea, Ikerketa eta Feminismoak
Artea, Ikerketa eta Feminismoa ikerketa-taldea. UPV/EHU
Artium Museoko Emanaldi aretoan, 17:00etan

Aurkezpena: Jendetzaren erdian, atxiloketari begira
Gema Intxaustiren eta Lourdes Méndezen arteko solasaldia
Artium Museoko Emanaldi aretoan, 19:00etan

Argibide gehiago 

Hasiera: Bigarren bidea
Ibilbide feministak, Museoaren Bildumaren Zeru bat, hamaika bide erakusketan
A0 aretoa

Argibide gehiago

Martxoaren 6an, larunbata

Proiekzioa: Moyra Davey-ren Les Goddesses trilogia

  • Les Goddesses,  (2011)
  • Hemlock Forest (2016)
  • Wedding Loop (2017)

Artium Museoko Emanaldi aretoan, 16:30etik – 18:30era
Aurkezlea: Beatriz Herráez, Artium Museoaren zuzendaria.

Solasaldia: Moyra Davey, Lur Olaizola, Laura Vallés
Artium Museoko Emanaldi aretoan, 19:00etan. Ingelesez; aldibereko itzulpena egingo da.

Argibide gehiago 

Martxoaren 8an, astelehena

Proiekzioa: Esther Ferrer. Denbora-hariak
Josu Rekalderen dokumentala
Artium Museoko Emanaldi aretoan, 17:00etan

Solasaldia: Esther Ferrer, Josu Rekalde, Beatriz Herráez
Artium Museoko Emanaldi aretoan, 18:30ean

Argibide gehiago 

Publicado en Jarduerak

Zinema frantsesa ikusteko eta zinemari buruz frantsesez aritzeko lekua. Hil honetan: 100 kilos d'étoiles

Publicado en Jarduerak

Zinema frantsesa ikusteko eta zinemari buruz frantsesez aritzeko lekua. Hil honetan: Tout ce qu'il me reste de la révolution

Publicado en Jarduerak

Zinema frantsesa ikusteko eta zinemari buruz frantsesez aritzeko lekua. Hil honetan: Geronimo

Publicado en Jarduerak

Zinema frantsesa ikusteko eta zinemari buruz frantsesez aritzeko lekua. Hil honetan: Bird people

Publicado en Jarduerak

Ikasgelatik espazio publikora jardunaldiekin hasiko da udazkeneko denboraldia Artium Museoan, Euskal Herriko Unibertsitateko GizaArtea ikerketa-taldearekin eta unibertsitate horretako Artearen eta Musikaren Historia Sailarekin batera antolaturik Jardunaldiak irailaren 30ean eta urriaren 1ean egingo dira. Jardunaldi horiek antolatuz, arte-espezialitateetako ikasleek zer gai ikertzen dituzten aztertu nahi da. Gainera, urriaren 3an, larunbata, Hasieratik. Zinema feministaren historiak zikloaren hirugarren saioa izango da, Agnès Varda zuzendari frantsesari eskainia, Garbiñe Ortegaren aurkezpenarekin. Asteburuan, gainera, Artiumek hainbat ibilbide gidatu programatu ditu Euskal Herriko artearen praktiken iragana, oraina eta etorkizuna ezagutzeko.

Irudiak  

Artium Museoak, Euskal Herriko Unibertsitateko GizaArtea ikerketa-taldeak eta unibertsitate horretako Artearen eta Musikaren Historia Sailak Ikasgeletatik espazio publikora izeneko jardunaldiak antolatu dituzte. Jardunaldi horiek Museoko Emanaldi aretoan egingo dira irailaren 30ean eta urriaren 1ean. Jardunaldi horiek antolatuz, arte-espezialitateetako ikasleek zer gai ikertzen dituzten aztertu nahi da, eta, ondorioz, Euskal Autonomia Erkidegoko goi-mailako irakaskuntzan azken ikasturteetan arte garaikidearen inguruan egin diren lanen sorta bat ezagutarazi nahi da. Aurreikusitako zortzi saioak streaming bidez jarraitu ahal izango dira Museoaren webgunean eta Youtubeko kanalean.

Martxoan egitea aurreikusita zegoen eta pandemia dela eta atzeratu behar izan diren jardunaldu hauen helburua honako hau da: edozein diziplina artistikori, artearen historiari, filosofiari, arte-hezkuntzari, ikus-entzunezko komunikazioari eta abarri buruzko lan akademikoa ezagutaraztea, eta unibertsitatearen, museoaren eta gizartearen arteko loturak ezagutaraztea. Aldi berean, jardunaldien helburua da sorkuntza artistiko garaikidearen inguruko diziplina eta ezagutza-arlo desberdinetako graduatuen arteko topagune bat sortzea.

GizaArtea ikerketa-taldeko, Letren Fakultateko eta EHUko Arte Ederren Fakultateko, Musikeneko eta Artium Museoko kideek osatutako batzorde zientifiko batek hautatutako 29 aurkezpenak gaien arabera banatu dira 8 mahaitan, jardunaldi bakoitzean lau. Hizlari bakoitzak 20 minutu izango ditu bere lanaren edukia aurkezteko. Mahai bakoitzak moderatzaile bat izango du. Aurkezpenak egingo diren aretoak edukiera mugatua duenez, bertaratzeko izena eman behar da helbide honetan: actividades1@artium.eus.

Programa osoa ikusi  

Zinema feministaren zikloa ta ibilbide gidatuak

Bestalde, Museoak Hasieratik. Zinema feministaren historiak zikloaren hirugarren saioa eskainiko du datorren larunbatean, Agnès Varda zuzendari frantziarrari eskainia eta Garbiñe Ortegaren, Punto de Vista Nafarroako Zinema Dokumentalaren Nazioarteko Jaialdiko zuzendari artistikoaren eta Zinema Gaur jaialdiko komisarioaren aurkezpena izango duena. Saio honetan, arratsaldeko seietan, 1975ean egindako Réponse de femmes: Notre corps, notre sexe film laburra eta 1976ko Daguerréotypes dokumentala proiektatuko dira. Lehendabizikoan, Vardak «zer da emakume bat?» galderari eman dakizkiokeen erantzun posibleetako batzuk ematen ditu. Bigarrenean, bizi den kaleko, Rue Daguerre-ko, mapa soziala marrazten du zuzendariak, denda txikiak eta haien jabeak abiapuntu hartuta.

Gainera, udazkenean, Artium Museoak LORATEGItik ibilbide gidatuen programari eutsiko dio. Proposamen horrek hiru ibilbide ditu, eta, oro har, Euskal Herriko testuinguru sozial eta artistikoaren lau hamarkada hartzen ditu kontuan, 70eko hamarkadaren erdialdetik gaur egunera arte. Alde batetik, programak artearen praktiken iraganera, orainaldira eta etorkizunera hurbiltzeko aukera ematen du, Eraikitzen ari den bilduma batetik abiatutako kontakizunak-etan; bestetik, artearen historiaren barruan beste istorio batzuk azaleratzen ditu, Praktika artistikoak eta feminismoak Euskal Herriko testuinguruan aurkeztuz; eta Museoko erakusketa monografikoetan barrena egindako ibilaldiekin osatzen da guztia. Urriko lehen asteburu honetan, Artiumek ikastaro trinko labur bat eskainiko du, artearen iraganari, orainari eta etorkizunari buruzkoa, eta bisita gidatu bana egingo dira larunbatean 12:30ean eta 17:30ean, eta igandean 12:30ean. Bisita guztiak doakoak dira eta edukiera mugatua

Prentsa oharra ikusi (pdf)    

Publicado en Prentsa bulegoa

This site uses cookies and similar technologies.

If you not change browser settings, you agree to it. Learn more

I understand